Sagar hotel Bhosari भोसरीत हॉटेल भागीदारीत ८० लाखांची फसवणूक; विश्वासघात करत व्यवसाय बंद पाडल्याचा आरोप
पिंपरी-चिंचवड: व्यवसाय भागीदारीच्या नावाखाली मोठी फसवणूक झाल्याचा एक धक्कादायक प्रकार भोसरी परिसरात समोर आला आहे. दोन आरोपींनी भागीदारांचा विश्वास संपादन करून त्यांना हॉटेल व्यवसायात तब्बल ८० लाख रुपयांचा गंडा घातल्याचा आरोप आहे.Sagar hotel Bhosari
हा प्रकार सप्टेंबर २०१९ ते नोव्हेंबर २०२३ या कालावधीत घडला. फिर्यादी संदीप शंकर गवळी (वय ४६), त्यांचे मित्र रघुनाथ बाकल आणि प्रवीण विरदे यांनी आरोपी विनोद वसंत चव्हाण आणि मनोज वसंत चव्हाण यांच्यासोबत हॉटेल व्यवसाय सुरू केला होता. या व्यवसायासाठी फिर्यादींनी ३० लाख रुपये, तर त्यांच्या दोन्ही मित्रांनी प्रत्येकी १० लाख रुपये अशी एकूण ५० लाख रुपयांची गुंतवणूक केली.
करारानुसार, व्यवसायातील सर्व रक्कम चालू खात्यावर जमा होणे अपेक्षित होते, मात्र आरोपींनी संगनमत करून हॉटेलमधून मिळणारी रोख रक्कम आणि ऑनलाइन पेमेंट स्वतःच्या बँक खात्यात वळवली. त्यानंतर त्यांनी व्यवसाय तोट्यात असल्याचे दाखवून हॉटेल बंद केले. तसेच, त्यातील ३० लाखांचे फर्निचर आणि इतर साहित्य परस्पर विकून टाकले. अशाप्रकारे, त्यांनी फिर्यादी आणि त्यांच्या मित्रांची एकूण ८० लाख रुपयांची आर्थिक फसवणूक केली आहे.
या प्रकरणी भोसरी पोलीस ठाण्यात गुन्हा दाखल करण्यात आला असून, पोलीस उपनिरीक्षक गुरव अधिक तपास करत आहेत. व्यवसाय भागीदारी करताना कायदेशीर करार करणे आणि आर्थिक व्यवहारांवर लक्ष ठेवणे किती महत्त्वाचे आहे, हे या घटनेतून पुन्हा एकदा समोर आले आहे.