मुंबई, (दि. ३० ऑक्टोबर २०२५): महाराष्ट्राची जीवनवाहिनी असलेल्या एसटी बसेस दररोज लाखो प्रवाशांना त्यांच्या इच्छितस्थळी सुरक्षितपणे पोहोचवतात. प्रवाशांना सुरक्षित आणि सौजन्यशील सेवा मिळावी यासाठी एसटी महामंडळ कटिबद्ध आहे, परंतु काही कर्मचारी कर्तव्यावर असताना मद्यपान करत असल्याच्या गंभीर तक्रारी प्राप्त झाल्या होत्या. या पार्श्वभूमीवर परिवहन मंत्री तथा एसटी महामंडळाचे अध्यक्ष श्री. प्रताप सरनाईक यांनी मद्यपी कर्मचाऱ्यांवर कठोर कारवाई करण्याचे आदेश दिले होते. त्यानुसार, राज्यभरात राबवलेल्या अचानक तपासणी मोहिमेत कर्तव्यावर असताना मद्यपान करणाऱ्या ७ कर्मचाऱ्यांवर कारवाईचा बडगा उगारण्यात आला असून, त्यांना तत्काळ निलंबित करण्यात आले आहे. मंत्री सरनाईक यांनी स्पष्ट केले की, मद्यपान करून कर्तव्य बजावणाऱ्या कर्मचाऱ्यांना एसटीमध्ये कोणताही थारा दिला जाणार नाही.
मंत्री प्रताप सरनाईक यांच्या निर्देशानुसार, एसटी महामंडळाच्या सुरक्षा आणि दक्षता खात्याने (Security and Vigilance Department) दिनांक २८ ऑक्टोबर २०२५ रोजी राज्यभरातील सर्व विभागांमध्ये कार्यरत असलेले चालक, वाहक आणि यांत्रिक कर्मचाऱ्यांच्या मद्यपान तपासणीची एक मोठी आणि अचानक मोहीम राबवली. या अचानक केलेल्या कारवाईमुळे महामंडळात एकच खळबळ उडाली. या मोहिमेअंतर्गत सुमारे १७०१ कर्मचाऱ्यांची कसून तपासणी करण्यात आली; यात ७१९ चालक, ५२४ वाहक आणि ४५८ यांत्रिक कर्मचाऱ्यांचा समावेश होता. ही तपासणी मोहीम प्रवाशांच्या सुरक्षिततेसाठी महामंडळ किती गंभीर आहे, हेच दर्शवते.
या व्यापक तपासणी मोहिमेदरम्यान, कर्तव्य बजावत असताना मद्यपान केल्याचे आढळून आलेल्या ७ कर्मचाऱ्यांवर दोषारोप निश्चित करण्यात आले असून, त्यांना तत्काळ निलंबित करण्यात आले आहे. यामध्ये धुळे विभागातून एक यांत्रिक कर्मचारी, एक स्वच्छक आणि एक चालक मद्यपान करताना सापडले. तर नाशिक विभागातून एक चालक दोषी आढळला. परभणी आणि भंडारा विभागांत प्रत्येकी एक यांत्रिक कर्मचारी मद्याच्या अमलाखाली काम करताना आढळला, तर नांदेड विभागाच्या तपासणीत एक वाहक मद्यपान केलेला आढळून आला. कर्तव्यावर असताना मद्यपान करणे हा केवळ शिस्तीचा भंग नसून, प्रवाशांचा जीव धोक्यात घालण्यासारखा गंभीर गुन्हा आहे.
एसटी महामंडळाने या सातही निलंबित कर्मचाऱ्यांवर पुढील प्रशासकीय कारवाई सुरू केली असून, या मोहिमेचा सविस्तर अहवाल तातडीने मुंबई येथील मध्यवर्ती कार्यालयात सादर करण्यात आला आहे. परिवहन मंत्री प्रताप सरनाईक यांनी पुन्हा एकदा बजावले की, प्रवाशांची सुरक्षा ही एसटी महामंडळाची सर्वोच्च प्राथमिकता आहे. कोणत्याही परिस्थितीत ती धोक्यात आणली जाणार नाही. भविष्यातही अशा प्रकारच्या तपासण्या अचानकपणे सुरूच राहतील आणि मद्यपान करून कर्तव्य बजावण्याचा प्रयत्न करणाऱ्यांवर कठोरतम कारवाई केली जाईल, असा इशाराही त्यांनी दिला.
Tags:
News