"५० लाख रुपये भरा अन् दोन तासांत १ कोटी रुपये खात्यात मिळवा!"—अशा भुलथापांना भुलून नाशिकमधील एका तरुण कांदा व्यापाऱ्याला तब्बल ५० लाख रुपयांचा चुना लागल्याचा धक्कादायक प्रकार उघडकीस आला आहे. भद्रकाली पोलीस ठाण्यात या महाठगांविरोधात फसवणुकीचा गुन्हा दाखल झाला असून या घटनेने व्यापारी वर्गात एकच खळबळ उडाली आहे!
चहाच्या टपरीवर शिजला ५० लाखांच्या गंडवण्याचा प्लॅन!
लासलगाव येथील २९ वर्षीय कांदा व्यापारी अजय संजय शेटे यांना त्यांच्याच मित्राने 'टी.पी.एफ.' (Trade Profit Fund) बद्दल माहिती दिली. "हा फंड भारतात पूर्णपणे कायदेशीर असून छोट्या व्यावसायिकांना मोठा नफा मिळवून देतो," असा गोड दावा करण्यात आला.
५० लाख रुपये रोख गुंतवले तर थेट १ कोटी मिळतील, त्यातील २० लाख कमिशन कापून ८० लाख रोख खात्यात जमा होतील, अशी लालूच दाखवण्यात आली. व्यापाऱ्याने स्वतःचे आणि मित्रांकडून उसनेपासने करून तब्बल ५० लाख रुपयांची रोकड जमा केली.
ऑफिसमध्ये नोटा मोजल्या, पावती दिली अन्... २ तासांत खेळ खल्लास!
३० सप्टेंबर रोजी नाशिकच्या दहिपूल परिसरातील 'जय अंबे एंटरप्रायझेस'च्या कार्यालयात ५० लाखांची रोकड घेऊन व्यापारी पोहोचला. तिथे उपस्थित 'विकी' नावाच्या व्यक्तीने नोटा मोजण्याच्या मशीनवर ५० लाख मोजून घेतले आणि अधिकृत दिसणारी पावतीही हातावर टेकवली. "खाली चहा प्यायला जा, २ तासांत बँक खात्यावर १ कोटी रुपये जमा होतील," असं सांगून त्यांना खाली पाठवलं.
खाली चहा पिऊन वर येईपर्यंत भामटे ऑफिस सोडून पसार!
चहा पिऊन २ तासांनी व्यापारी जेव्हा कार्यालयात गेला, तेव्हा तिथे सामसूम! ऑफिस उघडे होते, मात्र ५० लाख रुपये घेणारा 'विकी' आणि त्याचा साथीदार रफूचक्कर झाले होते. संशयिताला फोन लावला असता त्याने "बिझी आहे" सांगून फोन कट केला व नंतर मोबाईल बंद करून टाकला. आजूबाजूला चौकशी केली असता ते ऑफिस अवघ्या काही दिवसांसाठी भाड्याने घेतल्याचे समोर आले.
चार जणांविरुद्ध गुन्हा दाखल:
फसवणूक झाल्याचे लक्षात येताच व्यापाऱ्याने भद्रकाली पोलीस ठाण्यात धाव घेतली. याप्रकरणी:
संतोष शर्मा (रा. दिल्ली)
विजयकुमार पटेल (जय अंबे एंटरप्रायझेस)
विकी (कार्यालयातील इसम)
एक अनोळखी साथीदार
यांच्याविरुद्ध फसवणुकीचा गुन्हा दाखल करण्यात आला असून पोलीस अधिक तपास करत आहेत.
📢 पुणे सिटी लाईव्हचे आवाहन: "कमी वेळेत पैसे दुप्पट" किंवा "मोठ्या परताव्याची हमी" देणाऱ्या अशा कोणत्याही भामट्यांच्या जाळ्यात अडकू नका. कोणताही व्यवहार करताना सावध राहा!