.png)
पुणे, ०२ ऑगस्ट २०२५: हिंजवडीजवळ ताथवडे येथील एडन गार्डन सोसायटीच्या गेटवर एका भरधाव कारने अवघ्या अडीच वर्षांच्या चिमुकलीला धडक दिली. या भीषण अपघातात गंभीर जखमी झालेल्या मुलीचा दुर्दैवी मृत्यू झाला असून, कारचालक अपघातस्थळावरून पसार झाला आहे. या घटनेमुळे परिसरात हळहळ व्यक्त होत आहे.
अपघाताचा थरार
शुक्रवार (दि. ०१ ऑगस्ट २०२५) रोजी सकाळी ९:०० वाजण्याच्या सुमारास ही हृदयद्रावक घटना घडली. ताथवडे येथील एडन गार्डन सोसायटीच्या गेटवर ही दुर्दैवी चिमुकली, शिवानी जगन दाभाडे (वय ३ वर्षे ०६ महिने), खेळत असताना तिच्यावर काळाने घाला घातला.
फिर्यादी जगन वामन दाभाडे (वय ५०, धंदा-हाऊसकीपिंग, रा. ताथवडे, पुणे) यांनी दिलेल्या तक्रारीनुसार, अक्षय शांताराम चौधरी (वय २८, रा. वाकड, पुणे) याने त्याची कार एडन गार्डन सोसायटीच्या गेटवर अत्यंत हयगयीने, अविचाराने आणि भरधाव वेगात चालवली. वाहतुकीच्या नियमांकडे पूर्णपणे दुर्लक्ष करून, त्याने शिवानीला जोरदार धडक दिली.
या भीषण धडकेत शिवानी गंभीर जखमी झाली आणि तिचा दुर्दैवी मृत्यू झाला. अपघात घडवून, कारचालक अक्षय चौधरी कोणतीही मदत न करता किंवा पोलिसांना माहिती न देता थेट घटनास्थळावरून पसार झाला.
पोलिसांची कारवाई
या प्रकरणी हिंजवडी पोलीस ठाण्यात गु.र.नं. ५०८/२०२५, भारतीय न्याय संहिता कलम १०६ (१), २८१, सह मोटार वाहन कायदा कलम १८४, ११९/१७७ नुसार गुन्हा दाखल करण्यात आला आहे. आरोपी अक्षय शांताराम चौधरी याला अद्याप अटक करण्यात आलेली नाही. पोलीस त्याचा कसून शोध घेत आहेत.
या हृदयद्रावक घटनेमुळे नागरिकांमध्ये संताप व्यक्त होत असून, बेदरकारपणे वाहन चालवून निष्पाप लोकांचा बळी घेणाऱ्यांवर कठोर कारवाई करण्याची मागणी जोर धरू लागली आहे.