.jpg)
भोसरी, २८ जुलै २०२५: पुणे-नाशिक हायवेवरील पीएमटी चौकात, सार्वजनिक स्वच्छतागृहासमोर, एका मद्यधुंद वाहनचालकाने दारू पिऊन गोंधळ घातल्याची घटना रविवारी (दि. २७ जुलै २०२५) दुपारी घडली. या व्यक्तीने वाहतुकीस अडथळा निर्माण करण्यासोबतच पोलिसांशी हुज्जत घालून शासकीय कामात अडथळा आणला.
मिळालेल्या माहितीनुसार, विनय नवनाथ चौधरी (वय २९, रा. देवकर वस्ती, कॉलनी नंबर १, गणराज मित्रमंडळजवळ, चक्रपाणी वसाहत, भोसरी, पुणे) असे अटक केलेल्या आरोपीचे नाव आहे. ही घटना २७ जुलै २०२५ रोजी दुपारी १२:२५ वाजण्याच्या सुमारास पीएमटी चौक, भोसरी पोलीस चौकीसमोर, पुणे-नाशिक हायवे, भोसरी येथे घडली.
भोसरी पोलीस स्टेशनचे पोलीस उपनिरीक्षक शिवकुमार वैजनाथ दगडगावे यांनी या प्रकरणी फिर्याद दिली आहे. फिर्यादीनुसार, आरोपी विनय चौधरी याने मद्यार्क सेवन केले होते आणि तो नशेत धुंद अवस्थेत होता. त्याने त्याची एमएच १४ एमके ००९३ क्रमांकाची मोटार कार बेदरकारपणे चालवली. सार्वजनिक ठिकाणी त्याने मोठ्याने आरडाओरड करत वाहतुकीस अडथळा निर्माण केला.
पोलीस उपनिरीक्षक दगडगावे आणि त्यांच्यासोबतचे अधिकारी व कर्मचारी यांनी त्याला हटकले असता, आरोपी विनय चौधरी याने त्यांना शिवीगाळ केली आणि धक्काबुक्की करत शासकीय कामात अडथळा निर्माण केला.
या प्रकरणी भोसरी पोलीस ठाण्यात गु.र.नं. ३३२/२०२५, भारतीय न्याय संहिता कलम १३२, २८५, ११५(२), ३५२ सह महाराष्ट्र दारूबंदी अधिनियम कलम ८५ आणि मोटार वाहन कायदा कलम १८५ प्रमाणे गुन्हा दाखल करण्यात आला आहे. आरोपी विनय नवनाथ चौधरी याला पोलिसांनी अटक केली असून, या प्रकरणाचा पुढील तपास सुरू आहे.
सार्वजनिक ठिकाणी मद्यपान करून गोंधळ घालणाऱ्यांवर पोलीस कठोर कारवाई करत असल्याचे या घटनेतून स्पष्ट झाले आहे.