Bhosari Metro Station: शहरात गुन्हेगारीचा आलेख दिवसेंदिवस वाढत असताना, पुणे-नाशिकफाटा येथील कासारवाडीजवळील भोसरी मेट्रो स्टेशनच्या खाली एका धक्कादायक घटनेत एका २१ वर्षीय तरुणावर कोयत्याने जीवघेणा हल्ला करण्यात आला आहे. भररस्त्यात झालेल्या या हल्ल्यामुळे नागरिकांमध्ये भीतीचे वातावरण पसरले आहे. विशेष म्हणजे, आरोपींनी फिर्यादीला मारहाण करत असताना, मदतीला धावणाऱ्या नागरिकांनाही कोयत्याचा धाक दाखवून धमकावले. या गंभीर घटनेप्रकरणी आता नव्याने लागू झालेल्या भारतीय न्याय संहीता २०२३ सह विविध कलमांखाली गुन्हा दाखल करण्यात आला आहे. मात्र, आरोपी अद्याप फरार आहेत.
मिळालेल्या माहितीनुसार, पिंपरी येथून आपल्या मित्राला बोपोडीला सोडायला जात असताना फिर्यादी संकेत सचिन भोसले (वय २१, रा. बाराचे वस्ती, बुध्दविहार शेजारी, आंबेडकर चौक, भाऊपाटिल रोड, बोपोडी औध रोड, पुणे) हे दि. २६ नोव्हेंबर २०२५ रोजी रात्री ११:३० ते ११:४५ च्या सुमारास भोसरी मेट्रो स्टेशनखाली, नाशिकफाटा, कासारवाडीजवळ आले. त्याचवेळी मागून दोन मोटरसायकलवरून आलेले आरोपी विक्रम देवकुळे, गणेश बावधाने उर्फ काचडी (रा. पाटील रोड, ऑध रोड, बोपोडी, पुणे) आणि निलेश शिवगण (रा. पडाळवस्ती, भाऊ) यांनी त्यांना "काय बघतो?" असे बोलून शिवीगाळ करण्यास सुरुवात केली.
या शाब्दिक वादाचे पर्यावसन गंभीर मारहाणीत झाले. आरोपी क्रमांक १ आणि २, म्हणजेच विक्रम देवकुळे आणि गणेश बावधाने उर्फ काचडी, यांनी त्यांच्या हातात असलेल्या कोयत्याने "तुला ठारच मारतो" असे बोलून संकेत भोसले यांच्या गळ्यावर वार केला. संकेत यांनी प्रसंगावधान राखत उजवा हात मध्ये घालून तो वार आडवला, परंतु त्यानंतर चिडलेल्या आरोपींनी त्यांच्या डोक्यावर, दोन्ही हातावर आणि दोन्ही पायांवर कोयत्याने सपासप वार केले. एवढेच नव्हे, तर आरोपींनी संकेत यांच्या दोन्ही हाताचे चावेही घेतले. या हल्ल्यादरम्यान आरोपी क्रमांक ३ निलेश शिवगण याने सिमेंटच्या गड्डूने फिर्यादीच्या पाठीवर मारहाण केली.
या भीषण हल्ल्यामुळे रस्त्यावर बघ्यांची गर्दी जमली. काही लोक संकेत भोसले यांना वाचवण्यासाठी धावून आले, तेव्हा आरोपींनी त्यांनाही सोडले नाही. कोयत्याचा धाक दाखवत, "आम्ही या भागाचे भाई, गुंड आहोत," असे बोलून "मदतीला याल तर मारुनच टाकतो," अशी उघड धमकी दिली. त्यामुळे मदतीसाठी येणारे नागरिक घाबरून सैरावैरा पळून गेले. या गंभीर घटनेची नोंद दि. २७ नोव्हेंबर २०२५ रोजी दुपारी ३:२७ वाजता करण्यात आली असून, पोलिसांनी भारतीय न्याय संहीता २०२३ चे कलम १०९ (२), ३ (५), भारतीय हत्यार कायदा कलम ४ (२५), तसेच महाराष्ट्र पोलीस कायदा कलम ३७ (१) (३) सह १३५ अन्वये गुन्हा दाखल केला आहे. या प्रकरणाचा पुढील तपास पोलीस उपनिरीक्षक भास्कर हे करत आहेत. पुण्यात वाढलेल्या कोयता गँगच्या घटनांवर नियंत्रण मिळवणे पोलिसांपुढे मोठे आव्हान बनले आहे.