.jpg)
चाकण, ३० जुलै २०२५: मेदनकरवाडी येथे एका भरधाव ट्रकने कारला पाठीमागून जोरदार धडक दिल्याने कार पलटी होऊन डिव्हायडरच्या पलीकडे ढकलली गेली. या भीषण अपघातात कारचालक गंभीर जखमी झाला असून, ट्रकचालक मात्र अपघातस्थळावरून पळून गेला आहे.
घडलेली घटना
मिळालेल्या माहितीनुसार, मंगळवारी (दि. २९ जुलै २०२५) रोजी सायंकाळच्या सुमारास सचिन निंवा बोरसे (वय २९, रा. बंगला वस्ती, मेदनकरवाडी, ता. खेड, जि. पुणे) हे त्यांची ह्युंदाई ऑरा कार (एमएच १४ एमएच ४२१९) चालवत घरी परत येत होते. मेदनकरवाडीतील आयएआय कंपनीच्या गेटच्या ५० फूट अलीकडे, भगत वस्तीकडे जाणाऱ्या सिग्नलजवळ ते आले असता, पाठीमागून आलेल्या एका भरधाव ट्रकने त्यांच्या कारला जोरदार धडक दिली.
एमएच ०४ जीसी ५५८० क्रमांकाच्या या ट्रकवरील अज्ञात चालकाने बेदरकारपणे आणि रस्त्याच्या परिस्थितीकडे दुर्लक्ष करून ट्रक चालवला. ट्रकची धडक इतकी भीषण होती की, सचिन बोरसे यांची कार पलटी होऊन डिव्हायडरच्या पलीकडे फेकली गेली. या अपघातात कारचे मोठे नुकसान झाले असून ती पूर्णपणे चेपली आहे. सचिन बोरसे यांनाही गंभीर दुखापत झाली आहे.
अपघात घडवून ट्रकचालकाने कोणत्याही प्रकारची वैद्यकीय मदत न करता, आपला ट्रक सोडून घटनास्थळावरून पळ काढला.
पोलिसांची कारवाई
या प्रकरणी चाकण पोलीस ठाण्यात गु.र.नं. ५४२/२०२५, भारतीय न्याय संहिता (BNS) कलम २८१, १२५ (a), १२५ (ड), ३२४ (४) आणि मोटार वाहन कायदा कलम १८४ प्रमाणे गुन्हा दाखल करण्यात आला आहे. पोलीस नाईक भालेराव या प्रकरणाचा पुढील तपास करत आहेत. अज्ञात ट्रकचालकाचा शोध घेण्यासाठी पोलीस अधिक तपास करत आहेत.
बेदरकार वाहन चालवून अपघातांना कारणीभूत ठरणाऱ्या चालकांवर कठोर कारवाई करण्याची मागणी नागरिकांकडून केली जात आहे.